តួនាទី ភារកិច្ច និងសមត្ថកិច្ចរបស់គណៈកម្មការ នីតិកម្ម និង យុត្តិធម៌ គណៈកម្មការ នីតិកម្ម និងយុត្តិធម៌ គឺជាអង្គការចាត់តាំងរបស់ព្រឹទ្ធសភាស្ថិតនៅក្នុង ​ស្ថាប័ន ​ព្រឹទ្ធសភាអាចហៅកាត់ថា គណៈកម្មការទី៦ និងសរសេរជាអក្សរកាត់ថា គ.ន.ក.យ ។
គណៈកម្មការនីតិកម្ម និងយុត្តិធម៌របស់ព្រឹទ្ធសភា មានតួនាទីជួយព្រឹទ្ធសភាក្នុង​ការ​ពិនិត្យ​អត្ថបទច្បាប់បញ្ហានានា ធ្វើសេចក្តីស្នើច្បាប់ បទបញ្ជាផ្ទៃក្នុង ឬ វិសោធន កម្មបទបញ្ជា​ផ្ទៃក្នុង​ព្រឹទ្ធសភា ផ្តល់ព័ត៌មានដែល បានរកឃើញ នាំយកសំណូមពរទទួលបានពីមូលដ្ឋាន និងពិនិត្យ​រាល់​សកម្មភាពក្នុងវិស័យនីតិកម្ម និងយុត្តាធិការ ដែលទាក់ទងទៅនឹងគោលការណ៍វិមជ្ឈការ និង​វិសហមជ្ឈការ ក្នុងភូមិភាគ ឬថ្នាក់ជាតិជូនគណៈកម្មាធិការ អចិន្ត្រៃយ៍ព្រឹទ្ធសភា និងព្រឹទ្ធសភា ​ទាំងមូល។

គណៈកម្មការនីតិកម្ម និងយុត្តិធម៌មានភារកិច្ចដូចតទៅ ៖
-នាំយកយោបល់និងជំហរគណៈកម្មការពីការពិនិត្យអត្ថបទច្បាប់ ឬបញ្ហានានាជូនគណៈ​កម្មាធិការ អចិន្ត្រៃយ៍ និងអង្គប្រជុំពេញអង្គព្រឹទ្ធសភា
- ធ្វើសេចក្តីស្នើច្បាប់ បទបញ្ជាផ្ទៃក្នុងព្រឹទ្ធសភា វិសោធនកម្មបទបញ្ជាផ្ទៃក្នុងព្រឹទ្ធសភា និងបញ្ហានានា ដែលគណៈកម្មាធិការអចិន្ត្រៃយ៍ព្រឹទ្ធសភា ឬព្រឹទ្ធសភា ទាំងមូលប្រគល់ឱ្យ
-ពិនិត្យនិងឱ្យយោបល់រាល់អត្ថបទច្បាប់ ឬបញ្ហានានារបស់គណៈកម្មការជំនាញ​ដទៃ​ទៀត ដែលបាន អញ្ជើញ ឬបានស្នើសុំយោបល់ ឬតាមការបង្គាប់ពី គណៈកម្មាធិការ​អចិន្ត្រៃយ៍​ព្រឹទ្ធសភា -ពិនិត្យការអនុវត្តរដ្ឋធម្មនុញ្ញច្បាប់ជាធរមានបទបញ្ជាផ្ទៃក្នុងព្រឹទ្ធសភានិងបញ្ហានានា ​របស់ ព្រឹទ្ធសភា ដែលមានលក្ខណៈ ជាច្បាប់ ឬបទបញ្ជា ដើម្បីមានគោលការណ៍ច្បាស់លាស់​ក្នុងកិច្ច សម្របសម្រួលឱ្យប្រព្រឹត្តទៅបានល្អ និងឯកភាពក្នុងប្រព័ន្ធច្បាប់
-សវនាការជាសាធារណៈដើម្បីប្រមូលយោបល់ និងស្តាប់មតិបំភ្លឺក្នុងបញ្ហាទាំងទ្បាយ​ទាក់ទងនឹង អត្ថបទច្បាប់សេចក្តីស្នើច្បាប់ដែលបម្រុងព្រាងទ្បើងរួមទាំង បញ្ហានានា ដែលយល់​ថា​ចាំបាច់ និងមានប្រយោជន៍
-ទំនាក់ទំនង និងសហប្រតិបត្តិការជាមួយអង្គការជាតិ អន្តរជាតិ និងសមត្ថកិច្ចជំនាញ​ របស់រដ្ឋសភារាជរដ្ឋាភិបាលស្ថាប័នមូលដ្ឋាននិងប្រភពជ្រើសតាំង ដើម្បីស្វែង យល់នូវព័ត៌មាន​ទាំងទ្បាយ និងរកការជួយឧបត្តម្ភ
- ចេញសេចក្តីរាយការណ៍ ឬសេចក្តីថ្លែងការណ៍ ឬអនុសាសន៍ជាលាយលក្ខណ៍អក្សរ ជាសាធារណៈនូវលទ្ធផលនៃការតាមដានត្រួតពិនិត្យបានរកឃើញដែល ទាក់ទង ទៅនឹងវិស័យ​នីតិកម្ម និងយុត្តាធិការ។

គណៈកម្មការនីតិកម្ម និងយុត្តិធម៌មានសមត្ថកិច្ច ៖ ប្រតិបត្តិតាមរដ្ឋធម្មនុញ្ញ ច្បាប់ជាធរមាន បទបញ្ជាផ្ទៃក្នុងព្រឹទ្ធសភា សេចក្តីសម្រេចស្តីពី តួនាទី ភារកិច្ច និងសមត្ថកិច្ចរបស់គណៈកម្មការនីតិកម្ម និងយុត្តិធម៌ និងគណៈកម្ម​ការជំនាញ​ដទៃ​ទៀត និងបញ្ហានានា របស់ព្រឹទ្ធសភា ដែលមានលក្ខណៈជាច្បាប់ ឬបទបញ្ជាក្នុងរង្វង់ នៃក្របខណ្ឌជំនាញរបស់ខ្លួន។